ليه بحب البرمجة؟!

 

عشان حاجات كتيرة من طريقة التفكير وحل المشكلات لحدي القروش الممكن تكسبها من وراها، لكن لو ما عارف البرمجة دي هي شنو ولا شغالة كيف خش الرابط ده بيديك الزيت، الاسباب والحاجات الكتيرة ده ممكن نقول مشرتكة بين الناس لكن أنا حأكتب حسب تجربتي الخاصة.

 

اولاً: الاحساس بالانجاز وترويض الآلة:

اكتر شعور مفرح لمن تعمل ليك برنامج بيعمل بالضبط الانت عاوزو أو بالطريقة الأنت عاوزها، احساس الانجاز انك خلقت ليك شي قدرت تسيطر على المكنة المعقدة الاسمها كومبيوتر دي وقدرت تروضها، والاحساس ده غالباً هو بكون من الدوافع الكتيرة البتخليك تواصل برمجة، والاحساس ده بزيد مع صعوبة البرنامج المحدد كل ما كان أصعب كل ما كان فرحتو اكبر وده بينقلنا للسبب التاني.

ثانياً: استنهاض روح التحدي جواك لحل المشاكل:

كل ما البرنامج البتعمل فيهو ده يعصلج معاك وما يمشي زي ما عاوز كل ما حتركب راس عشان انت سيد الآلة والشفت ما ممكن حتة كومبيوتر ما يسمع الكلام ويلخبطو ليك وده بخليك تجتهد وتصر على مجابهة الصعاب والكومبيوترات الأشرار، وعشان تحل المشاكل دي واللي هي ما بيخلو منها برنامج ما قدامك غير السبب التالت.

ثالثاً: التفكير في حل المشاكل:

دي بقى من اعظم هبات البرمجة انها بتخليك تطور تفكيرك وبتبقى مصمم لي انك تحل المشاكل وتفكيرك بيبقى موجه لي حل المشاكل، وده طبعاً حيفيدك ويطورك في مجال البرمجة وخارج مجال البرمجة، لانو انت اصلاً بتعمل برنامج عشان تحل مشكلة، يعني ممكن تعمل مشغل موسيقى عشان تحل مشكلة انك عاوز تشغل غنا وهكذا، والحياة ذاتها في عموميتها وفي حياتنا اليومية عبارة عن حل مشاكل، اها شفتو ربطت ليكم بين مشغل الموسيقى وحل المشاكل والحياة وده برضو مربوط بي السبب الرابع.

رابعاً: تعلم التجريد وتوسيع رؤيتك للأشياء في علاقاتها :

دي الزيت بقى بتبقى ما مندهش من العالم وبتشوف من الحاجة الصغيرة امكانية لي انها تتجرد وتتعمم لي درجة بعيدة، يعني لمن تكون بتعمل في نظام كبير او برنامج معقد بتتطر تشوف في مخك الصورة الشاملة وعلاقات مكوناتها مع بعض وبتقسمها لي مشاكل صغيرة كل ما تحل مشكلة، بتكون قربت للصورة النهائية للبرنامج ودي بتنقلنا لي السبب الخامس.

خامساً التفكير النقدي:

التفكير النقدي ده لو ما عندك ما حتطور شي وكل ما تعمل برنامج حتقتنع انو ما كامل مهما يكون مدهش ودايما حتنتقدو وتعدل وتطور فيهو والمهارة دي لمن تتنقل لي حياتك حتفتح قدامك ابواب تطور مهولة.

وللذكرتو فوق ده والنسيتو دي بعض اسباب اني بحب البرمجة ليه، وبشجع اي زول يجرب ويشوف ولو ركز حيحبها زيي.