يعني شنو برمجة ؟!!

 

البرمجة ممكن نعرفها على انها علم وفن ترجمة مجموعة من الافكار لي برامج - مجموعة من التعليمات البيباريها الكومبيوتر - والزول البيكتب البرامج دي بيسموهو مبرمج أو coder أو كواد زي ما بحب اسميهم.

وشكل الكلام البتكتب ده او الكود البرمجي ده بيعتمد على اللغة المكتوب بيها الكود ذاتو، واللغات البيفهما الكومبيوتر بتتدرج من لغات مستوى ادنى من 0 و 1 لحدي لغات مستوى اعلى زي لغة جافا مثلا، ولغة ادنى واعلى بتتحدد حسب قربها من لغة البني آدمين الزينا ديل يعني كل ما كانت اللغة قريبة من اللغة الطبيعية دي بتبقى عالية.

يعني برنامج بيكتب hello world في الشاشة في لغة مستوى ادنى زي لغة التجميع حيكون كده:

وفي لغة عليا زي جافا بكون:

وطبعا كل لغة أو مجموعة لغات عندها خصائص محددة وبتستخدم لأغراض محددة حسب الحوجة للبرنامج المطلوب. ولغات البرمجة برضو عندها اقسام كتيرة زي :

• لغات تطوير البرامج والتطبيقات.
• لغات ذكاء اصطناعي.
• لغات قواعد بيانات.
• لغات تطوير العاب.
• لغات تطوير انظمة التشغيل.
• لغات تطوير الانترنت.

وبعد المبرمج ده يخلص كتابة الكود، عشان يشتغل البرنامج بيتم ترجمتو او تفسيره حسب اللغة لي لغة يقدر ينفذا الكومبيوتر ودي مهمة المترجم المحدد لي اللغة المحددة.

وبعد يشتغل البرنامج، المبرمج بيحتاج يتأكد انو البرنامج شغال زي ما مفروض يشتغل، ومرات الحاجات ما بتشتغل زي ما متوقع او يحصل ايرور او خطأ وده بيسموهو Bug او بق و عملية تصحيح الاخطاء دي بسموها دي بقينق دقيقة بالانجليزي نكتبها Debugging ودي بتم فيها البحث وعزل المشاكل وتصليحها وبعدين ترجمة البرنامج تاني.

وده بمختصر كده قصة البرمجة مهارة بيتعلمها الزول وبتبدا بي لغة وساهلة بعد تتعلم لغة تتعلم اكتر من لغة لأنهم كلهم بيتشاركوا خصائص مشتركة وبيتعاملوا مع نفس الجهاز، ونصيحتي ليك لو قريت لحدي هنا ما تتردد تتعلم البرمجة لانها ممتعة وبتوسع مداركك وما بتضرك واقرا زيادة عنها لو حبيت الفكرة.