كيف تتعلم البرمجة ؟!

 

تعلم البرمجة من المهارات المنتشرة الايام دي في العالم، وشدة ما مطلوبة عالمياً بقت تتدرس على مستوى الثانوي في المقررات الدراسية لي بعض الدول، ومع تحول معظم جوانب حياتنا في اتجاه العالم الرقمي والاتمتة – من اوتوماتيك وكده – والذكاء الاصطناعي والهواتف الذكية ووو تعلم البرمجة بقى حوجة القرن.

اي شي ممكن تفكر فيهو ممكن يتعمل ليهو تطبيق او موقع من انك تطلب تاكسي ولا تشتري اونلاين، لحدي قراية الكورسات زي ناس كوداكاديمي والالعاب زي ببجي، مع الحاصل ده زاد الطلب على المطورين والمبرمجين وبقى تعلم لغات البرمجة فيهو مصلحة حلوة – على قول المصريين – خلونا نشوف كيف تتعلم لغة البرمجة العاوزها والطريقة التبدا بيها تعليمك.

 قبل تواصل قراية لازم تتذكر انو طريق البرمجة ده بيتطلب صبر وتحفيذ مستمر ولازم ما تستسلم رغم الصعوبات الممكن تتحداك.

كيف تتعلم اساسيات البرمجة:

اختار اي لغة برمجة عجبتك او مهتم بيها وممكن تبدا تتعلم بواحدة من طريقتين:

1. في مواقع زي كودكاديمي Codecademy او Freecodecamp بيوصوا بيهم عندهم محاضرات برمجة ومصممة لي مراعات المبتدئين وبيوفروا بيئة تعليمية من برامج كتابة اونلاين وممكن تبرمج طوالي على الويب.

2. من خلال دروس فيديو: لو كنت زول زيي كده بتحب التفاصيل او عندك مشكلة بتاعة نت – سوداني اصيل يعني – ممكن تحضر سلسلة دروس فيديوهات وعادة بتبدأ من كيف تنزل وتثبت البرامج الحتحتاج ليها لحدي نهاية الموضوع المحدد للسلسلة ودي مفيدة جداً وما محتاجة منك جهد كبير ومن اليوتيوب حتى ممكن تنزلها وتلقاها.

أهم شي تركز على أساسيات البرمجة:

لازم اساسك بتاع البرمجة يكون متين عشان تقدر تمشي كويس اتعلم الاساسيات وركز فيها وجربها بي يدك وما تزهج ممكن تحس بيها ما منطقية او ما منها فايدة لكن لي قدام بتظبطك – صدقني – الاساسيات دي زي لو انت اشتغلت طُلبة مع معلم بناء بوريك دي مسطرينة وده ميزان موية دي بتتخلط كده وبترص الطوب كده بي الأساسيات دي ممكن تبني غرفة ولا مخزن او عمارة يلا دي زي اساسيات البرمجة والاساسيات دي تقرياً في كل لغات البرمجة موجودة عشان كده لازم تركز فيها عشان لو استوعبتها ممكن تغير من لغة برمجة لي تانية بي سلاسة وسهولة والاساسيات دي زي:

·        الأنواع البيانية Data Types.

·        المتغيرات Variables.

·        الدوال Functions.

·        المصفوفات والقوائم Array or Lists.

·        جمل الشرط If statements.

·        جمل التكرار Loops.

·        الاصناف والكائنات Classes and Objects.

·        معالجة الاستثناءات Exception Handling.

·        الاشجار الخرائط وهياكل البيانات Trees Maps And Data Structures.

ما تتخلع بي الاسامي الفوق دي كلها حاجات ومفاهيم بسيطة وبتتظبط براااحة.

لازم تعمل مشروعك الأول:

كيف تختار مشروع؟!

دي الحاجة البتشغلها لي معظم الناس انو اعمل مشروع شنو ويعمل شنو ؟ وبسيط ولا معقد ؟؟ هل حأقدر انفذو ولا لا ؟ ما تشيل هم ركز مع الجاي.

اختار الحاجة البتهمك

لو اخترت شي بهمك حتضمن انك ما حتمل من المشروع وحتلقى نفسك فيهو، يعني ممكن لو بتحب التصوير تعمل موقع لي معرض مصور فوتوغرافي مثلاً، او موقع تحميل ومشاهدة افلام لو بتحب الافلام، او حتى موقع يلقى ليك كلمات الاغاني البتحبها عشان تغني معاها وهكذا.

ابدا بي شي بسيط

برضو من المهم تبدأ بي شي بسيط عشان ما يصعب عليك وتقنع يعني لوعاوز تعمل لعبة ما تبدأ بي كول اوف ديوتي ابدا بي اكس أوو مثلا واقعد اتمرن على اللغة اكتر واكتر بعد زمن ما بعيد ممكن تشتغل على مشروع معقد أكتر وهكذا.

اعمل شي مفيد ليك ولي الحواليك

دي حاجة برضو كويسة كان ليك او الحولك منها تفيدهم وتقدم خدمة وممكن تتجدع بيها للناس وبترفع اسهمك لو عاوز تواصل شغل كمبرمج برضو.

لو حاسي انك اصطكيت او علقت ما قادر تتقدم ؟

مرات وانت شغال في مشروعك بتصل مرحلة بتحس انك ما قادر تتقدم خطوة وايررورز ايفري وير يعني والامور جايطة وما بتظبط وده ما شي مخيف وما تقلق ممكن تتفاداهو او تعالجو بي طريقة بسيطة

فتش الخطأ في قوقل

اول شي شوف الايررور وين وفتشو في قوقل وحتلقى جغلمية زول جاهو الايرور بتاعك ده ومجتمع المبرمجين مجتمع متكاتف جداً ومساعد جداً حتلقى حل ممكن تسأل ويساعدوك او تلقى فيديو يوريك تتخارج كيف ... الخ فخلي قوقل صاحب الصدوق وكده.

مواقع مشهورة ممكن تفيدك

في مواقع بتساعدك كتير في مجتمع البرمجة وفي مواقع مخصصة للغات بي عينها لكن اهم 3 مواقع بالنسبة لي:

·        ستاك اوفر فلو Stack-Overflow: ده موقع بتخش بتكتب سؤالك او مشكلتك وبيجو مبرمجين من حول العالم بيجاوبو ويساعدوك وممكن لو مشكلتك اتحلت تحدد انو ده حلى لي المشكلة.

·        كود بروجيكت Codeproject: ده زي استاك اوفر فلو في الاسئلة بس بإضافة انو ممكن تكتب مقال عن موضوع برمجي محدد وترفق الكود كمثال والناس ممكن تنزلوا وتجربو.

·        قيت هب Githhub: وده موقع بتاع اوبن سورس وبرضو version control بتلقى فيهو اكواد اوبن سورس لحاجات قريبة للشغال فيها ومتاحة للتحميل وممكن تطور فيها وتضيف ليها وتخدم مجتمع البرمجة.

 

الخلاصة:

ممكن تعلم نفسك البرمجة وتبدع وترطب بيها عديل بس انت طول بالك وركز مع الأساسيات وطور نفسك وما تخجل تسأل وتفتش ابسط الحاجات في قوقل واتذكر مافي شي صعب ولافي شي ما بيتعمل بس انت روق كده واقعد ليها حتة حتة وحتكتشف غباء الكومبيوتر ده وشوية شوية حتلقى نفسك انطلقت وابدعت.