المتغيرات في عالم البرمجة

 

المتغيرات:

اول ما تسمع كلمة متغيرات دي ممكن تجوط أو تستغرب، ولو جينا نعرف المتغيرات دي اي زول بكون عندو تصور مختلف، لكن اتطمنوا دي ما متغيرات الرياضيات الغياظة ديك بتاعة س و ص أو ناس x و y الموضوع عندنا مختلف شوية ورايق شوية ومفيد وما خطير نهائي بس زي ما قلنا ده من اهم المفاهيم الأساسية ولو متذكرين من المقال الفات ده بتاع كيف تتعلم البرمجة كررنا فيهو اهم شي تركز على الأساسيات لأنها حتلاقيك في اي حتة ومهمة جداً، وانا هنا ما حأتكلم عن لغة برمجة محددة اعزل اللغة الأنت دارها وحتلقى المفاهيم البنتكلم عنها هي هي موجودة، تعالوا نشوف المتغيرات دي شنو ؟؟!!

المتغير ده بي بساطة كده عبارة عن عنوان مكان في الذاكرة مربوط بي اسم؛ يعني شنو ؟ طيب واحدة واحدة اتخيل معاي أنا عاوز اعمل برنامج بيجمع عددين صحيحين عاوز حتة اخزن فيها الأول لحدي ما الزول يقول لي عاوز يجمع كم لي كم وحتة اخزن فيها العدد التاني عشان بعد كده اخلي البرنامج يجمعهم ليهو، طيب الحتة البخزن فيها دي يا عزيز هي الرام RAM اي اللمن تجي تشتري لابتوب ولا تلفون يقولوا ليك ده رامو 4 قيقا ديك، طيب الرام دي عشان اخزن رقم صحيح حتختو لي في حتة واي حتة في الرام عندها عنوان دقيقة اوريكم عناوين الرام عاملة كيف 0x6dfed4 يعني عشان تخزن الرقمين ديل وتتذكر محلاتهم دي شغلة عويرة، طيب حلوها كيف نجروا المصطلح بتاع المتغيرات ده انا بربط العنوان 0x6dfed4 ده بي اسم مثلاً اسميهو first بدل احفظ العنوان الطويل ده اتذكر بس فيرست والامور تمشي.

يعني لو عندي المساحة في الرام العنوانا 0012CCGWH80 قمت سميتها myNumber وخزنت فيهو الرقم 23 حيكون الموضوع زي ما في الصورة التحت دي و بقدر اتعامل مع المساحة دي من خلال الاسم myNumber اغيرها امسحا ازيدها ابقيها 25 اي شي.

طيب المتغيرات دي عندها ستة مفاهيم حاتكلم عنهم كل واحد في بوست براهو وحأعمل ابديت لي كل مفهوم من الحأكتبهم تحت بي الرابط للبوست والمفاهيم دي كالآتي:

1. تسمية المتغير Name.
2. عنوان المتغير Address.
3. قيمة المتغير Value.
4. نوع المتغير Type.
5. دورة حياة المتغير Lifetime.
6. مجال المتغير Scope.

ده بي بساطة كده لمن تسمع مبرمج بتكلم عن متغير يجي الكلام القلناه فوق ده على بالك وتفهموا قاصد شنو، هو ربط لي عنوان في الذاكرة بي رمز من حروف او انك تدي مساحة في الرام انت عاوز تتعامل معاها اسم تسهل بيهو التعامل ده.