الاسماء أو التسميات في عالم البرمجة

 

الأسماء:

زي ما قلنا لمن اتكلمنا عن المتغيرات هنا حنتكلم عن الاسامي مش بس في المتغيرات لكن في الحاجات الانت ممكن تسميها والموضوع الصغيروني ده ممكن يعذب الزول لو ما وقع ليهو كويس واتعود عليه.

طيب تعالو نشوف الاسماء دي شنو ذاتو؟ الاسماء ببساطة سسلسلة من الحروف برمز بيها او بستخدمها عشان ادلل على حاجة في البرنامج بتاعي ممكن يكون اسم متغير او اسم كلاس او اسم انترفيس او اسم دالة ...الخ طيب ده بقودنا لي مشاكل وزي ما قلنا اصلاً البرمجة خلقوها تحل المشاكل او مشكلة ممكن تلاقينا انو انا اطول كمية حروف ممكن استخدمها عشان اسمي لي حاجة قدر شنو؟ ده يا سيدي بيعتمد على لغة البرمجة الشغال بيها شوفتو كيف لازم تركز مع الاساسيات. يعني مثلاً في لغة اسمها فورتران 1 او FORTRAN1 دي اطول اسم فيها 6 حروف او خانات، في لغة سي C او فورتران90 FORTRAN90  اطول شي مسموح بيهو 31 حرف او خانة في السي بلس بلس C++ ما محددين طول.

المشكلة التانية بتكون في انو اوصل الكلمات كيف غالبا في اللغات بيستخدمو علامة الاندرسكور unde-score دي البين القوسين دي ( _ ) البتلقاها في علامة الناقص لمن تدوس معاها شيفت. يعني مثلا متغير فيهو راتب الموظف الاساسي لو قلت employee basic salary  حيفهم employee بعد المسافة دي حيعتبرها حاجة براها وما حيفهما فبنحلها كده employee_basic_salary ككلمة واحدة.

المشكلة التالتة هل اللغة دي كيس سينستيف دقيقة بالانجليزي اسهل case sensitive بمعنى ممكن اسمي كابيتال Capital  و اسمول small ولا لا وده برضو حسب اللغة يعني فورتران دي تكتب حروف كبيرة بس او uppercase في مثلا لغات جافا java و لغة سي C و لغة سي بلس بلس C++ الاتنين ممكن تشتغل بيهم سواء كابيتال او اسمول ودي بتخلق صعوبات احياناً الكتابة بتبقى صعبة عشان حتحتاج تتذكر الاسم بي كابيتال واسمول وياتو حرف ما كابيتال ... الخ وبالتالي بتصعب حفظ الاسبيلينغ بتاع المتغيرات البتشتغل بيها والقراية بتبقى صعبة عشان نفس الحروف ممكن يعنو حاجة تانية يعني مثلا ROSE ما نفس Rose ما نفس rose دي عبارة عن 3 اسماء مختلفة ممكن تشير لي 3 حاجات مختلفة.

اخيرا عادة بيكون في كلمات خاصة او محجوزة ما بتقدر تسمي بيها ودي زي ما بنقول بتختلف من لغة لي تانية فلازم تعرف الكلمات المحجوزة دي عشان ما حينفع تسمي بيها